خليكوا شاهدين يا بـ على غدر البنى أدمين ... خلينا شاهدين على أية شاهدين ان البجاحة والبجاسة ليها حدود بس على فكرة تقريبا كان زمان دلوقتى خلاص نحن فى عصر العولمة عصر ممارسة ! مش الرزيلة لا البجاحة أه ما هى البجاحة تمارس أيضا" ولكن لأول مرة على شاشات التليفزيون فين فى أعلانات الضرائب يقولك أية هفوترك وتطلع كام الفوترة عشرين بالمائة وعلى مين على الحلاق والميكانيكى وهذه هى الأنشطة التى جائت بالأعلان لكن من المؤكد أنها تمارس أيضا" على المكوجى وعلى الترزجى وعلى محلات سندوتشات الفول والطعمية و على الكل كليلة المهم بقى ان الأعلان بكل بجاحة وبجاسة يقولك عشرين بالمائة بس هو الموضوع كله عشرين بالمائة فقط ... يا حلولى يا حلولى دة أية دة البيحصلى ... يعنى أنا لو حلاق أخد من واحد عشرة جنية الضرايب تاخد أتنين جنية وهى ولا غسلت شعر زبون ولا نفضتلوا قفاه ولا بدرتوا هى بس روأت صاحب المحل أشتغلت الحلاق الغلبان جباية عافية هتدفع وقيس على كدة بقى باقى الأشغال يعنى ميكانيكى نام تحت عربية وغير بوجيهات والزيت نزل على وشوا وفى الأخر الضرايب تاخد عشرين بالمائة مش بقولك بجاسة يعنى فى دول كتير بتاخد ضرايب أكتر من كدة علشان بس هيطلعلك أحدهم يقولك فى بلاد جزر الهملاى بساحل الحاج أبو مشمش بجوار الساحل الشمالى فى مكان ما بيخدوا أكتر من كدة بكتير نقولوا أية نقولوا يا زوق هم بيخدوا أه بس بيدوا لكن نظام هات بس دة عندنا بس يعنى فى أى دولة المواطن بيدفع ضرايب بس أية بيتـظبط يعنى علاج فى أحسن مستشفيات مفيش حاجة أسمها حكومى وخاص مفيش حاجة أسمها مفيش سراير مفيش ممرضة كل شوية تقولك الف سلامة ويا أما تديها الفى النصيب يا أما هى تديك بوز وشخطة تخليك ترقد جنب المريض المعاك مفيش حمام المجارى ضربة فية مفيش حاجة أسمها أبعت أشترى أزازة مكروكروم وكيس قطن مفيش حاجة أسمها عايزين تسعتاشر واحد من قرايب المريض يتبرعوا بالدم قبل ما نمد أدينا فية وتلاقى قرايب العيان كل واحد حاطط قطنة على دراعوا وكأنهم كانوا فى معركة حربية كلوا زى بعضوا والتعليم كمان كلوا زى بعضوا مفيش فرق علشان كدة الناس بتدفع بقلب راضى ونفس مطمئنه علشان كدة الدول دية بتتقدم أنما عندنا الناس بتدفع غصب وأقتدار على رأى أخونا اللمبى ما هو خريج مدارس حكومة وكان بيقول بـ بواخة وغين غور ياض هو دة التعليم وهى دية الضرايب والأغرب أو البجاسة بتبلغ القمة لما تلاقى الممثل محمد شومان بيشاور بأيده فيما معناه أن عشرين بالمائة أفترى وطبعا دية قمة السماجة وطبعا كلنا عارفين أن محمد شومان أعلن التوبة النصوح عن هذه الاعلانات وقال بالفم المليان أنا مكنتش أعرف أن الناس بيوتها هتتخرب خصوصا لما قبلنى واحد وقلى منك لله على سبيل الدعابة لكنها أثرت فيه جامد وهذا الحوار موجود بجريدة المصرى اليوم لكن أحنا هنقولوا لا يا محمد متزعلش خلاص حصل خير مجتش عليك المهم ان فية حد أستفاد طبعا مش الناس الصدقتك يا محمد لا أنت أتشهرت والأدوار نزلت ترف عليك والحصل حصل متزعلش نفسك يا حمام مش غلطتك ما أنت كمان كنت مصدق العيب على الشعب أصل الناس المش عارفة تتحكم وبعدين أحنا كلنا عارفين أن المصرى فهلوى يعنى عندوا طرق للتهرب ... المصرى معروف أنه حط الشمس فى الأزازة وبعها وطبعا مدفعش ضرايب فكان لازم حد يمثل علية ويأكلة المهلبية ويحسسوا أن الضرايب دية هى ماما وهى بابا وهى أنور وجدى وسلملى على كل من أكل المهلبية سواء بمعلقة أو بصباعة . أحمد سرور
يوم الأعتصام يكرم المرء أو يهان يوم الأعتصام كل شئ أنكشف وبان خلاص الوشوش ظهرت على الطبيعة مفيش مساحيق كل واحد ظهر بلونه الحقيقى أحزاب المعارضة المعترف بها من الدولة غياب شاهد مشفش حاجة ملهاش وجود محضرتش الحصة ومسمعتش الدرس الخاص بصفحة الأعتصامات ومدا تأثيرها فى التعبير عن الرفض وعلشان كدة ملهاش وجود حاولت تلحق وتدخل بس بحساب هى كانت بتسمع أن فيه أعتصام مين مصدرة متعرفش طيب تعتصم ولا متعتصمش متعرفش قررت أنها تمشى مع التيار تصبر إذا الرسايل الوصلتلها على المحمول ووصلت بالميل صحيحة نعتصم مع المعتصمين مكنش خلاص علشان كدة دورها كالعادة معدوم هو دة دور أحزاب المعارضة وهو ده الوجه الحقيقى لها ... نيجى للمحظورة ديما كدة تحيرك تخليك متعرفش الأعتصام حلال ولا حرام دورها كان عامل بالظبط مثل فتاوى الفضائيات متفهمش منه حاجة نفس السؤال لكن الفتوى مش واضحة وممكن تتغير من قناه لاخرى الفرق بينها وبين أحزاب المعارضة أنها عارفة ومتأكدة ان فيه أعتصام بس هى بتفكر تخرج منه كسبانه أية من النظام والمعتصمين لهم رب ولا نملك لهم إلا الدعاء هى كده ديما تحب تعقد الصفقات منفرده زى الفريك متحبش شيريك ... نيجى لدور الحكومة لغاية هنا وسمع هس محدش يضرب نار هدوء هو ده بالظبط الدور !! الترقب ثم الترقب ثم التعامل مع الأمر بروح ثورة يوليو ... أغانى وطنيه الفرق بس فيه المطربين والهدف زمان غنينا قلنا هنبنى وأدينا بنينا السد العالى ثورتنا ثورة أحرار ... الأن بنغنى مشربتش من نيلها ... يعنى يا أخى حس طالما شربت يبقى أنت أكيد فى مصر ... وهذا فقط جزء من التعامل قبل الحدث طيب وأثناء الحدث لا ملكش فيه خلاص الأمن هيتصرف ... الله يكون فى عون الأمن هيعمل أية ولا أية ... طيب والسادة الوزراء لا متقلقش ليهم دور هيطلعوا فى جولات تفقديه تثبت أن الدنيا بخير والحياة لونها بـمـبـى وإن الشعب كله عايش فى رفاهيه وعندما يوجه له مذيع القناه الأولى والفضائية السؤال ؟ ويقول له سعادتك سميعنا إن فيه أعتصام تحب تقول أية بخصوص هذا الموضوع ؟ هيرد ويقول عصام مين عصام !!! المذيع لا يا فندم أعتصام هيقول آه ويبتسم ويقول أعتصام معندناش الكلام دة أعتصام أية أنت شايف بنفسك أهو الصورة مبتكدبش الحياه ماشية عادى أنا أكاد أجزم إنها اليوم أكثر من العادى أحنا شعب مش بتاع أعتصام وكلام فاضى سيبك من هذا الكلام وكلمنى عن موجة الغلاء التى تجتاح العالم وينتهى الحوار وتنزل أغنية مصر اليوم فى عيد ... لكن هذه المرة كان فيه جديد أه الجديد ان رئيس الوزراء راح للمحله بنفسة واجتمع بالعمال وفى مشهد سينمائى مهيب يذكرنا فيه بخطاب الرئيس جمال عبد الناصر يوم تأميم قناه السويس الكان كلمة السر فيه دليسبس أول لما أقول دليسبس تأمم ... رئيس الوزراء أعاد الذكرى وقلهم أول لما أقول نص شهر مكافأه لجميع العاملين فى قطاع الغزل نهلل بس خلاص ! لا أنا عايز قمة التهليل الصريخ والعويل يملأ أرجاء المكان لأنى هقول كمان ونص شهر تانى خصوصى ليكم أنتم يا عمال المحلة لأن مصر مبتنساش ولادها المخلصين رئيس الوزراء حسيسنا أننا فى مايو يوم عيد العمال المنحة يا ريس ... يلا حد قال هات مين يزود ... هو ده الدور وهنا تنزل كلمة النهاية ... من هنا نقدر نقول ان مفيش أمل لفى أحزاب معارضة ولا فى محظورة ... وطبعا الحكومة هى نفسها مبتغيرش تفكيرها مش قادرة تصل لحقيقة وهى ان ما كان يصلح فى الماضى لا يصلح مع شباب يتعامل مع الأنــترنت شباب بيقدر يكون مجموعات على الفيس بوك ويقول ويدعوا لما يريد مسألتش الحكومة نفسها ليه هم عملوا كدة لا قضتها بروح ثورة يوليو أيام الأبيض والأسود أيام كان مفيش غير القناه الأولى والتليفيزيون كان بيشطب الساعة عشرة مش قادرة تصدق ان فية قنوات فضائية على الرغم من أنها هى صاحبة القمر .... أحمد سرور
أيه الاخبار أيها السادة والسيدات الكبار كله تمام الشعب مريح ولا عامل لحضراتكم ازعاج على العموم ان كان مضايقكم شويه معلش من عشمه والناس اذا ما عشمتش في كبراتها هتعشم في مين طب والله الشعب بيحبكم هو في بعض الاوقات بيبقى قليل الادب بس بيحبكم ليه أيوه أسألوني حضراتكم ليه لأنه لو مش بيحبكم كان مشاكم وجاب كبرات غيركم .... انا سامع واحد من حضراتكم من الكبرات بيسأل كده بإستغراب وبيقولي يقدر ...؟ آه معاليك يقدر يعني انت مين جابك هتقولي الكبير قوي هو اللي جابني أقولك ومين جاب الكبير قوي هتقوللي الكبير قوي اللي قبله وطب مين جاب الكبير قوي اللي قبله أوعي تقولها معاليك أوعى تقوللي اللي قبل قبله !!! معقول معاليكم الشعب ده طلع عبيط لا بيجيب ولا بيودي يعني لا بيهش ولا بينش علشان كده معاليكم مش بتخافه منه ده ما عندوش عين بيضه مش حمره يوريهالكم , طب وبدون يمين أنا لو مكان معاليكم لازم اعمل اللي بتعملوه وأتبت في الكرسي والأهم اللي بيجي من ورا الكرسي ... بحق ربنا بيكون في عونكم مازهقتوش من أكل الرومي والكافيار والخرفان؟ ده مش انا اللي بسأل ده واحد ابن كلب قليل الادب كان واقف في طابور العيش عامل فيها غلبان بس أنا شتمته انت مالك ومال الكلام ده يأكلوا حمام يأكلوا سيمون فيميه خليك مرمي في الرده وخد الرغيفين وروح بلاش كتر كلام وأحلى حاجه أنه معاليك ومعاليها زيه زي غيره من الشعب الحقود ما يعرفش بما أنه ما جابش عدم المؤاخذه معاليك ما يقدرش يمشيك وإن اللي جابك معاليك لو فيها أساءة أدب هو بس اللي يقدر يمشيك وأنا ماقصدش اللي جابك للدنيا يعني اللي نفضك لا أنا اقصد اللي رزانا بيك ده طبعا مش كلامي معاليك ده كلام الصيع العواطليه اللي ملحقين على القهاوي مش لاقين شغلانه بس الكلام كتر منهم قوي معاليك ومعاليها أصلهم بقوا كتار عاملين زي الهاموش في ليالي الصيف ... ألا بمناسبة الصيف معاليكم حتروحوا مارينا السنه دي زي السنه اللي فاتت ولا بقت بيئه لو هتغيروا أمانه عليكم تبلغوني علشان أجيب العيال وأمهم لا معاليك نيجي معاكم فين أحنا برضه قد المقام أحنا بس كنا هنقف على الطريق قبل المكان الجديد أو القديم يجي بكام كيلو كده ونعمل جو تأييد ومبايعات ربنا يباركلنا فيكم هو انتوا مش قاعدين معانا لطالون خلاص لازم كده تبقى الحكايه سن فا سون يعني من كتر عشرتكوا الطيبه بقيت ارطن لغات ومش برضه حضراتكم معانا لأبد الابدين خلاص يبقى لازم تعرفوا الشعب ده حدوده فين ... الطيبه بتاعتكم دي مودياكم في داهيه طب والله أقلكم على حاجه علشان أعرفكم الطيبة بتاععتكم دي طمعتهم قد أيه ده شعب غريب عايز يشرب ميه نضيفه زي معاليكم وياكل لقمة عيش من غير ما يتهان لا والأسخم من كده عايز يلبس ويلبس عياله هدمه عليها القيمه كمان طب فيه كده بالزمه مش تبطلوا طيبه وتفوقوا الشعب ده من أحلامه وتعرفوه حدوده ... دول اتجننوا ولا ايه خلاص ما بقاش فيه خشى كده ياكلوا ويلبسوا ويشربوا دول بيستهبلوا يعني نستورد جعانين نشحت من شعب تاني عريانين !!؟ بس ده كله من الطيبه بتعات معاليكم, وحياة الباشا الكبير ابو معاليك والست هانم الكبيره ام معاليكي ماتكونوا زعلتوا مني من كتر كلامي بس أصلي فرحان أني بكتب لمعاليكم والسلام أمانه لمعالي الكبير قوي اللي جابكم وبلغوه ما يفرطش فيكم ويخليكم حتى لو عضم في قفه تبقوا بركه كده وكمان يخلي شوية الشباب اللي زي الفل اللي جابهم النوبه اللي فاتت اللي بيلعبوا بالبيضه والحجر يعني حاجه تفتح النفس عقبال ماشوف الواد ابني زيهم انا اسف يعني خدام عند معاليهم وطبعا معالي الكبير قوي بلغوه أني احنا معاه الى ماشاء الله طب ده لو حصل حاجه تانيه تبقى ليله سوده طب أروح فين أنا وعيالي طب ده هو اللي قانينا ومأكلنا ومشربنا وكاسينا.... الشر بره وبعيد فكونا منها السيرة دي ربنا يجعل كلامنا خفيف على الثورجيه ووأمثالهم . على كل حال اسيبكم بالعافيه وربنا معى معاليكم واسـتأذن أصلي الوليه بتزن عايزه عيش وفول وجرجير يعني حاجه نفرح بيها الاولاد ربنا يبارك في معالي الحلوين الصغيرين أولاد معاليكم والمشوار ده ممكن يطول يعني على بال ما طابور العيش يوصل للشباك بتاع الفرن وبعديها لما يحن أحمد أفندي بتاع الفول ويديني بنص جنيه لازم أقعد أزن عليه أصله هوا بيدي الأول بتوع ابو جنيه وجنيه ونص العالم الاقطاعيين دول ... يوه هلت وأعجن من جديد والوليه مستنيه الجرجير قصدي الفول اسمحولي معاليكم بالانصراف علشان ترتاحوا ولا تحبوا ننصرف كلنا وترتاحوا انتوا مافيش مشاكل ياباشا ولما معاليكم تحسوا بالملل كده ابقوا شيعولي يا فندم انا خدام الاعتاب ... يعني لما تكونوا عايزين تحكموا يومين ولا حاجه من باب التغيير اخوكم اسف خدامكم شعب مصر . محمد حجازى
