البيان المصرى: نقول طور يقولوا أحلبوووو

بعد 14 سنة خدمة فى ثانوى بيقولى أقف وبعد 27 سنة من الحكم وتعاقب الوزارات طالب السيدالرئيس من السيد رئيس الوزراء بتوفير الخبز لأبناء الشعب يلا يدلعوا يلا قبل مايعقل حد يصدق فى كدة فى الصين فى كدة فى اليابان توفير الخبز العيش الحاف طيب الطبيخ هيجى أمتى ومش هنتكلم عن الطبيخ أبو لحمة أحنا هنتكلم عن الأرديـحى أبو ميا وقالب ماجى لأضافة النكهة الطبيعية ... لأن توفير العيش لجموع الشعب أخد 27 سنة وفى الأخر مش عارفين نوفر العيش الحاف للناس وعايزين ندخل النادى النووى بنتكلم عن ضرورة دخول مصر للصناعات النووية! نووية مين يا أبنى طيب الناس تاكل مـما الأول ... حاجة تكسف لما تفتح الجرائد والمحطات الفضائية وتشوف ضحايا طوابير العيش عارف لو كانوا الضحايا راحوا نتيجة طوابير الجمعية الكانت موجودة زمان والكان الناس بيقضوا فيها نص اليوم علشان يطلعوا بكيلوا لحمة ولا فرخة ولا بيضتين كانت تبقى مبلوعة لكن بعد الخطط الخمسية الجهنمية و تكالب الحكومات المتعاقبة على تنفيذها وصل الحال للعيش الحاف هيجى يوم وهيبقى يوم سقوط أول شهيد فى طوابير العيش الحاف أجازة رسمية فى البلاد زى الشهداء الراحوا فى حادث دنشوواى مع الفرق بين الحدثيين لأن الأول كان على أيدى المحتل لكن التانى مش عارف أوصفة ... وأحلى حاجة بقى لما تشوف السادة الوزراء والأبتسمات تعلوا الجباه تشوفهم وهم بيتكلموا عن ان الأمر مجرد أزمة زوبعة فى قاع الفنجان وليخسأ الخاسؤون وليمتنع المحظورون كل اليفتح بقوا يبقى من المحظورون وما أكثرهم ... ولا لما تقرا بعض القرارات وأخرها موضوع الزى الموحد للمومرضات وكأننا خلصنا كل حاجة وفاضل هنروح المستشفى النهاردة بأية! يا ناس حرام بقى الناس بتروح المستشفى متلأيش قطن ولا مكروكروم وأحنا بنقول زي ! يعنى الوزارة أجتمعت وأتفقت على هذا الأمر الخطير طيب عدم النظافة العامة غرف العمليات الملوثة ملهاش نصيب ... أرحمونا ولا لية ما هو الزي و الهندام يا مدام أرحم من النواوى يا أبيه ! وأرحم كمان من موضوع القرية الزكية نفسى أعرف بيعملوا فيها أية ولية زكية لية مثلا مكنش أسمها القرية الحديثة أو القرية المتميزة هل أسم زكية صدفة ولا علشان يكون عكس الغبية مش عارف على العموم أحنا هنفضل كدة نقول طور يقولوا أحلبوة يا جدعان دة طور هتحلبوة ! مفيش فايدة بنقول طور بس جربوا تحلبوة يعنى ندخل النادى النواوى وبعدين نشوف العيش الممرضين يتشيكوا وبعدين نشوف التأمين الصحى البنسمع عنه مع بداية عمر الوزارة العشانوا الوزير جاب أرجاء المعمورة علشان يشوف تجارب الأخرين وفى الأخر بح ولا حس ولا خبر المهم أنه معملش زى الوزير التانى لما زار الهند ومشفش أى تطور وصلتلوا الهند من تقدم فى الصناعات المختلفة ومن أهمها البرمجيات هو شاف حاجة واحدة بس التوكتوك عمل أية أمر بأستراد التوكتوك من الهند وبعدين طبعا الحل السحرى وصل ؟ الشرطة تلم التكاتك من الأسواق لية مش مشكلة من غير لية أكلوك الحلاوة يا زكى ... المهم الشو المهم الشياكة المهم أن الأزازة تفضل فى البزازة يا هوووووو . متنسوش تتفرجوا على حلقات أدينى عقلك الموجودة بالموقع هنا وفى صفحة الفيديو مكنتش أعرف أن عنوانها هيكون شعار المرحلة ... بقلم أحمد سرور