البيان المصرى: الكسل أحلى من العسل

فى أفلام زمان كان بيطلع صاحب الشركة وهو بتيكلم فى التليفون مع موظف عندوا واقف فى ساحة التداول داخل البورصة وكان البيظهر فى الصورة صاحب الشركة وتعبيراته بتتغير ووشوا بيصفر ويمسك قلبه ويموت بعد ما يضيع نص الفيلم فى هذا المشهد ونعرف أثناء الأحداث أنه جتلوا جلطة نتيجة تبليغ الموظف لية انه خسر كل ما يملك فى البورصة يا لا الهول أو يرجع فقير تانى وتخبطة عربية ويفقد الذاكرة بردوا يا لا الهول وعلشان كدة موضوع البورصة اتلغى لسنين طويلة من مصر يعنى تقريبا أتأمم مع ما تم تأميمة ... بس مع النداء الآلى للمطالبة بعودة الأقتصاد الحر رجعت البورصة تانى فى يوم وليلة وعلى نفس طريقة تحرير سعر الصرف - الصرف هنا لا يقصد به المجارى - وعلشان الناس أعتبرت أن أفلام زمان دية للتسلية جريت الناس على البورصة ونسيت كل أبطال الأفلام الذين لقوا حتفهم نتيجة اللعب فى البورصة وكانت النتيجة خسائر كبيرة... وعلى الرغم من هذا الا ان محدش ينكر أن فيه ناس حصدت مبالغ كبيرة من وراء البورصة بس السؤال من هم هؤلاء هل هم من البسطاء... يعنى خد عندك فى ناس باعت ممتلكات بسيطة وفكت ودائع العمر مثل اللباع التاكسى البيشتغل علية لأنه زهق من السواقة والفك وديعة المعاش المبكر ... وكلوا جرى وراء وهم . السؤال هل هم غلطانين من وجهة نظرى المتواضعة أكيد لأن الكسل هو السبب عايزين الكسل الأحلى من العسل طيب أهو النحله قرصتكم اللهم لا شماته بس لازم الواحد يبزل مجهود مفيش حد بيصبح مليونير من الهوا يعنى البورصة اليلعب فيها ومستعد ينكوى بنارها لازم يكون واحد عامل مبلغ للموضوع دة ميحطش كل ما يملك وبعدين يغنى ظلموا واحد عندوا دخل مش عايز يعيش عاله على البورصة ... وهذا طبعا بعيدا عن الخلاف على الحلال والحرام فى موضوع البورصة ... ولان المواطن عندنا هو شوخشيخة الحكومة فطبعا الحكومة لا وعت ولا نصحت ومعرفتش المواطن الغلبان أى معلومات غير أنها ساعدته على الحلم بالثراء وهو نايم فى مكانة ليه تشتغل وتتعب ما أحنا أشتغلنا كتير خدنا أية أنت بس أعطى فلوسك لشركة من شركات الأوراق المالية ونام أوخ فى البيت وكل يومين أنزل شقر عليهم شوف ممتلكاتك وأسهمك وصلت كام كلوا جرى ورا مبدأ نام وأرتاح يأتيك النجاح كلوا أشتغلها على طريقة لطفى فى مسلسل رحلة المليون السهم نزل بيع يا لطفى وديما بنجيب الغلط على لطفى لطفك يارب ... أحمد سرور