كالعادة التي اقتربت من ان تصبح شريكا دوريا في حياة المصريين هاجت الدنيا وماجت واختلط الحابل بالنابل مع اعلان الحكومة عن نيتها – المبيته – في بيع ثمانين بالمئه من اسهم بنك القاهره طبعا خرج رجال الحكومه والهتيفه التابعين لهم يدافعون عن صفقة البيع ولا اعلم لماذا يدافعون فلا الراي العام ولا نواب الشعب يشكلون معهم فارقا طب ليه حرقة الدم اذا كان البشوات والبهوات سيمضون قدما في طريقهم ولن يوقفهم شيء طب ليه الباشوات والبهوات يبهدلوا نفسهم مع الفشله الذين لا يعلمون شيئا عن الاقتصاد ولا الاصلاح وبعدين يعني حد قدر يوقف بيع بنزايون ولا بنك اسكندريه ولا ماتم بيعه بلاش دي انا عايز اقول للباشوات بيع بنك القاهره يعتبر بالجمله ماذا عن القطاعي حد وقف في وشكم فيما تم بيعه حد قلكم تلت التلاته كام طب ليه المنهاده مع شوية العيال الصيع المعارضين والمستقلين واللي عاملين نفسهم فاهمين وبعدين مش انتوا الحكومه هتخافوا من مين من الممكن ان نخاف نحن من الحكومه لكن هل تخاف الحكومه من نفسها بمعني لما انا اكتب مقال ها هنا اخاف من الحكومه فألجأ الى التحسيس لكن ممن تخاف الحكومه من الشعب ياراجل بلاش كلام فاضي شعب ايه نصفه يجري خلف اللقمه والنصف الذي كان بلا شغله ولا مشغله يجري اليوم خلف المياه ممن ستخاف الحكومه من الصحافه ياراجل ده نص الصحفيين جلهم اكتئاب والنصف الآخر ركبوا المرض ثم ان كتبوا ما كتبوا لايحدثون اي تغيير لماذا ناديت ولو اسمعت حيا ولا حياة لمن تنادي وبرضه اهي معايش للصحفيين يعني اذا لم يكن هناك بيع عن اي شيء سيكتبون وكيف كانوا سيصبحون نجوم وبدل وكرفاتات ولقاءات تلفزيونيه . ليس هناك مايمكن ان تخاف منه الحكومه نهائيا ولكن اوجه كلامي للباشاوات والبهوات في الحكومه عن مسألة البيع ارجو ان يكون البيع يا واش يا واش ياباشوات يعني بالراحه لماذا الاستعجال البلد بلدكم واللي بتبيعوه ملك ليكم ما حدش هيخدوا منكم ولا حد هيوقفكم ولا حد هيسألكم بعتوا بكام وأشتريتوا بكام بس البيع براحه علشان تلاقه حاجه تبيعوها في السوق بكره وعلشان البضاعه ماترتطرطشي في السوق بالراحه احنا ورانا ايه على اقل من مهلكم الشركه ورا الشركه ورا البنك بس اوعوا وانت في الزحمه تبيعوا مقر الحكومه لحسن دي تبقى عيبه عندي فكره حطوا علامة اكس على الوزارات والمقار الحكوميه الراغبين في عدم بيعها علشان لما المشتري يجي تنبهوا عليه اني اللي عليه اكس مش للبيع ..... اعتقد قليلة جدا علامة اكس ستكون على اي شيء واعتقد انها لن تكون موجوده على اي مبني اقلكم على بركة الله من غير علامة اكس واللي يجيلوا سوقه بيعوه والمبني اللي يتباع بيعوه وابنه مكانه باكتر من تمنه واهو كله مكسب والمصانع بس لو فيها اساءت ادب الاراضي هتجيبوا مكانها منين ؟؟؟؟ اما انا غبي بصحيح ما انتوا الحكومه هتتصرفوا اكيد بلاش غباوه مني بس ممكن بعد النصايح اللي سقتها في هذا المقال اجيب تحويشة العمر ومعاها تحويشة اخواتي وامي واهلي ونشتري اكرة باب بنك القاهره الرئيسي اهي حاجه نفتخر بيها قدام عيالنا وشكرا لمجهودكم الجبار في البيع ربنا معاكم من طلعة النهار في السوق وكلمة من ده وكلمه من ده دي حاجه متعبه بس مين يقدر . بقلم محمد حجازى |
